អ៊ីរ៉ង់ថាខ្លួនជួយផ្គត់ផ្គង់អាហារជាង១០០០ តោនឲ្យកាតារាល់ថ្ងៃ តែកាតារក្សាភាពស្ងៀមស្ងាត់

អន្តរជាតិ

អ៊ីរ៉ង់ថាខ្លួនជួយផ្គត់ផ្គង់អាហារជាង១០០០ តោនឲ្យកាតារាល់ថ្ងៃ តែកាតារក្សាភាពស្ងៀមស្ងាត់

25, Jun 2017 , 8:19 pm

រូបភាព

ដោយ:

កាតាត្រូវបានហ៊ុមព័ទ្ធដោយអារ៉ាប៊ីសាអូឌីត និងរដ្ឋឈូងសមុទ្រផ្សេងៗទៀត ហើយកាតាប្រឈមនឹងវិបត្តិខ្វះខាតអាហារផ្គត់ផ្គង់ដល់ប្រជាជនរបស់ខ្លួន។ ប៉ុន្តែអ៊ីរ៉ង់តាំងខ្លួនជាមិត្តល្អក្នុងគ្រាអាសន្ន ដោយជួយ បញ្ជូនអាហារចំនួន ១១០០តោនជារៀងរាល់ថ្ងៃទៅកាន់កាតា។

ស្បៀងអាហារប្រហែល ១១០០តោនត្រូវបានគេដឹកចេញពីអ៊ីរ៉ង់ទៅកាន់ប្រទេសកាតាជារៀងរាល់ថ្ងៃ ស្របពេលដែលប្រទេសនេះប្រឈមវិបត្តិខ្វះខាតស្បៀងអាហារ។

កាតាប្រឈមនឹងការខ្វះខាតស្បៀងអាហារបរិភោគប្រចាំថ្ងៃដោយសារតែការហ៊ុមព័ទ្ធរបស់អារ៉ាប៊ីសាអូឌីត និងបណ្ដារដ្ឋឈូងសមុទ្រ ហើយកាតាពឹងផ្អែកខ្លាំងលើការនាំចូលចំណីអាហារពីប្រទេសជិតខាងដូចអារ៉ាប៊ីសាអូឌីត និងអារ៉ាប់រួម អេមីរ៉ាត់ ផង។ ហើយបញ្ហាខ្វះខាតចំណីអាហារនេះកាន់តែធ្ងន់ធ្ងរ ព្រោះកាតាក៏រៀបចំបុណ្យតមអាហាររបស់ជនជាតិមូស្លីម(Ramadan)ផងនោះ។

ពាក់ព័ន្ធការផ្គត់ផ្គង់ស្បៀងទៅកាតានេះ លោកMohammad Mehdi Bonchari ប្រធានកំពង់ផែ Bushehr របស់អ៊ីរ៉ង់បានបញ្ជាក់ថា ទំនិញម្ហូបអាហារចំនួន១១០០តោនត្រូវបានដឹកចេញពីអ៊ីរ៉ង់ទៅ កាតាជារៀងរាល់ថ្ងៃ។ ម្យ៉ាងវិញទៀតដោយសារតែ កំពង់ផែននេះស្ថិតនៅជិតកាតា វាក៏អំណោយផលដល់ការដឹកជញ្ជូនស្បផងតាមផ្លូវទឹកនេះដែរ។

ក្រោយពេលកាតាត្រូវរដ្ឋអារ៉ាប់ផ្តាច់ទំនាក់ទំនង និងរងការហ៊ុមព័ទ្ធភ្លាមៗ អ៊ីរ៉ង់ក៏ចេញមុខជួយផ្គត់ផ្គង់ ស្បៀងភ្លាមៗដែរ ដោយរដ្ឋឥស្លាមមួយនេះបានដឹកបន្លែជាច្រើនតោនតាមយន្តហោះប្រាំគ្រឿង។អំឡុង ពេលនោះដែរ អ៊ីរ៉ង់ដឹកសាច់គោ ៦៦ តោនទៅកាន់កាតារួចទៅហើយ ហើយប្រទេសនេះក៏មានគម្រោងបញ្ជូនសាច់គោ ៩០តោនបន្ថែមទៀត។

កាលពីសប្ដាហ៍មុន នាយករងនៃក្រុមហ៊ុនពាណិជ្ជកម្មអ៊ីរ៉ង់លោកAbbas Maroufan បានបង្ហើបថា ទោះជាមានប្រទេសដប់ទៀតត្រូវកាត់ផ្ដាច់ការផ្គត់ផ្គង់អាហារដូចកាតាក៏ដោយ ក៏អ៊ីរ៉ង់មានសមត្ថភាពផ្គត់ផ្គង់ឲ្យដែរ។

សូមជម្រាបផងដែរថា ការផ្សព្វផ្សាយព័ត៌មានពាក់ព័ន្ធការបញ្ជូនស្បៀងអាហារអ៊ីរ៉ង់ទៅកាន់កាតានោះមានតែខាងអ៊ីរ៉ង់ប៉ុណ្ណោះ ឯខាងកាតានៅរក្សាភាពស្ងៀមស្ងាត់ព្រោះប្រទេសនេះខ្លាចមានបញ្ហាកាន់តែច្រើនជាមួយនឹងបណ្តារដ្ឋអារ៉ាប់ជាពិសេសអារ៉ាប៊ីសាអូឌីតដែលសត្រូវស៊ីសាច់ហុតឈាមរបស់អ៊ីរ៉ង់៕